Xúnite a la Intifada Homosexual!

Siéntolo muncho pero nun me lo da pa facevos subtítulos d'esti vidiu. Pa quien sepia inglés.

Primero foi en Vigo.

Agora ye en Liverpool.

Y asina tamos, día tres día, nueche tres nueche.

Figuráivos que tais perehí. Tais nun barucu y veis daquién que vos presta, que vos cautiva y vos atrapa'l corazón fuerte, a primera vista y que cuando mira pal to llau crucies una mirada furtiva que te provoca una sorrisa, pero la so reacción ye la de dir por ti.

A insultate.

A menazate

col deu,

colos puños,

con un cuchiellu.

A solmenate.

A date una guantada.

A tirate al suelo.

A pateate.

A emburriate contra la paré.

A metete navayaes.

A facete sangre.

A matate.

Peor aún. Que seya en casa d'un collaciu y quienes pienses que son los tos collacios te traicionen asina. Por nun tar faciendo nada malu.

Puta homofobia.

Hai que ver esto de los eufemismos cómo ye...

L'otru día taba yo nel bus y una paisana taba falando con una collacia comentando que Fulanita nun dicía delles coses porque "ye que tu yes mui políticamente correcta". Vínome nesi instante a la cabeza qu'eso a lo que se refería esa señora uvieína tola vida na mio casa llamóse "tener educación" o "ser educáu/ada".

Pásame pola cabeza muncho que reflexonar alrodiu de tol mundu que güei, por mor d'echar la llingua a pacer y dicir homofobidaes, escúsense nel fechu de que van "contracorriente" y son "políticamente incorrectos", faciendo orgullu d'eso...

Fumar ye un placer
xenial, sensual.

Fumando espero
al home que yo quiero,
tres los cristales
d'alegres ventanales.

Y mientres fumo,
la mio vida nun consumo
porque flotando'l fumu
suelo apigazar...

Tirada na chaisse longue
fumar y amar...

Ver a mio amante
dimpuestu y galante,
sentir los sos llabios
besar con besos sabios,
y el devanexar
sentir con más deseos
cuando los sos güeyos veo,
sedientos de pasión.

Poro tando mio bien
ye'l mio fumar un edén.

Apúrrime'l fumu de la to boca.
Anda, qu'asina me vuelvo lloca.

Cuerri que quiero alloriar
de placer,
sintiendo esi calor
del fumu embriagador
qu'acaba por prender
la llama ardiente del amor.

Restolando pela rede alcuéntrome con esti testucu sol amor bien bonu que lleera va unes selmanes pa unos alderiques na asociación.

Resulta bien interesante l'actu que fai neses trés fueyes l'autora Pilar Sampedro de llantar unes bases pa la deconstrucción de la nuestra concepción del amor. Esi amor pasional, esi constructu ideolóxicu, sofitáu pola lliteratura y les artes, esi amor que ye ensin ser ello mesmo, que se xustifica por sigo mesmo, ensin tener en cuenta variables como la fugacidá, los cámbeos vitales o el meru pasu'l tiempu.

¿Realmente facemos bien asentando un proyeutu vital como pue ser una pareya pa tola vida naguando por que tea allimentáu pol amor-pasión?

Esta entruga pue entamar ser respondida lleendo esti testu. Recomendáu.

Trés noticies, güei alrodiu la llingua, que non too va ser mariconaes nesti blog.

Una: Veinticinco años defendiendo la llingua

Dos: Valledor pide explicaciones sobre la «visión falsa» del bable que el Estado dio a Europa

Trés: Rechazada la propuesta para que el asturiano sea lengua propia de la Universidad

Asina ta'l patiu llocal, paisanes y paisanos. Si tuvieramos un pocu d'orgullu llingüísticu...

Nun soi yo mui amigu d'estos concursinos por dellos motivos. Sicasí, tuvi escazopiando pela rede y atopé un enllaz al concursu en cuestión. Diome por achisbar quién diba presentase y, aparte de decatame que les Islles Canaries presenten candidatura independiente d'España (que yá oyera yo pelos mentideros va tiempu pero nun-y pagara importancia), descubrí esti mocín tan prestosu llamáu James Ciaran.

Ser, nun sedré amigu de los concursos, pero sí soi mui, mui amiguín del pelo roxu. ¡Qué-ly h.aremos! Caún tien los sos defectos y virtúes, ¿non?

Si fuera votar pal concursu, de xuru que'l mio votu diba dir pa él. Irlandés y de pelo roxu. Qué envidia... d'él y del so mozu, carustá.

Por ciertu, déxovos equí otru enllaz interesante al rodiu'l tema esti de los concursinos "de belleza" (nun se m'ocurre otru nome y creo que sirve pa entendenos esa espresión).

Helena miró al traviés de la ventana, nuna cafetería nel centru de Tesalónica. La moza negra retorcíase nun charcu sangre mientres rutaba delles pallabres d'auxiliu, metada n'amáricu, malapenes nun griegu que tovía nun falaba curioso. Tirada nun requexu mientres naide nun podía oyir el so llamentar.

A Helena entró-y un fríu pel carrastiellu. Alcordábase de la mesma escena, años atrás, na que yera ella mesma la que taba tirada nunca cai de Xixón tres ser atacada per un grupu de cabeces rapaes ya intentaba pronunciar, ensin xacíu, una pallabra de socorru n'asturianu.

Helena tenía un día de perros. Llovía y obligáben-y a trabayar baxo l'agua y el fríu na rede de Cercaníes de FEVE, contando persones. Trabayu d'estudiante o d'inmigrante. Cansada, tomó la decisión d'abandonar el so puestu de trabayu un momentu y foi por un té caliente y un pinchucu chicucu pa recuperar enerxíes. Crució con una moza y caltuvieron les miraes, pero ella namás que-y contestó con un "¿Qué tas mirando?". Helena nun sabía bien l'asturianu y nun sabía qué taba pasando, y lo único que recibió como respuesta al so estáu de plasmada foi un "Dexa mirame asina d'una puta vez o te parto la cara".

Ye un fríu y lluviosu mundu ehí fuera, pero más fríu ta dientro'l mio corazón nestos momentos, pensó Helena...