La revolución ye'l mio mozu
La revolución ye’l mio mozu
The Raspberry Reich
Direutor: Bruce LaBruce
País: Canadá
Añu: 2004
¿Qué sedría de los movimientos reivindicativos o de sofitu a minoríes si nun tuvieren un ideal, una amuesa radical y estrema d'ideoloxía que-y faiga de pegollu? Esta película pertenez a esti campu. Nella preséntase una xunción d'izquierdismu radical y revolución sexual, cola que se forma un intensu plantegamientu ideolóxicu.
En tola filmación, recibimos información en base a eslóganes, datos históricos y puntos de vista sobre fechos políticos del pasáu y del presente. Dende'l plantegamientu de qué ye revolucionario y qué nun lo ye, desfilachando les posibilidaes que presenten ambos conceutos, baxo los que inda los cereales de l'almuerza son contrarrevolucionarios, hasta'l criteriu d'hiperpolitización del fenómenu sexual. Xúnite a la intifada homosexual, la heterosexualidá ye l'opiu les mases. Teoríes asemeyaes foron reflexaes notros llaos, como nel llibru Lisístrata de Ralf König.
Lo que pasa ye que la Revolución del Raspberry Reich, grupu activista, supera les perafitaes conceiciones y morales impuestes sobre nós, seres somerxíos na cultura que vvimos y a vegaes sufrimos. O tal vez, cenciellamente supera los nuestros propios impulsos, preferencies y atracciones. Una homosexualidá forzosa, pol fechu de pasar les llendes de Lo Impuesto, esi stablishment qu'hai d'abolir y destruir dende la base, desde'l raigón (radicalmente), pa construyir daqué nuevo, meyor, más puro. Una refuga fuerte a la monogamia, un intentu de superación del sentir celos, una transgresión de la propia orientación sexual pa dir escontra una bisexualidá innata y, polo tanto, “natural” al individuu.
Ye por ello que la Revolución, na parte final, acaba albortada inda enantes de ñacer. La praxis demuestra ser afarto más complexa d'executar de lo que la teoría pue columbrar. Una llástima que nun mos quede más remediu a los revolucionarios que dexar pa práu gran parte del nuestru ideariu como si fora un llastre, porque quiciabes nun teamos preparaos pa la Revolución. O la Revolución nun seya necesaria, ¿pue ser?...
A esti pasu, la revolución sí sedrá retresmitida per televisión.
Esbilla
del.icio.us
